2005 წლის მაისში ბერგენში (ნორვეგია) დადებული ხელშეკრულების თანახმად, საქართველო ბოლონიის პროცესს შეუერთდა. ჩვენთვის ბერგენის ხელშეკრულება ნიშნავს უმაღლესი განათლების რეფორმის დაჩქარებულ ტემპს, რათა მოვახერხოთ საერთო ევროპული უმაღლესი განათლების სივრცეში გაერთიანება.
       ბოლონიის დეკლარაცია ადგენს უმაღლესი განათლების განვითარების სხვადასხვა სტანდარტებს, რისი მიღწევაც აუცილებელი პირობაა ამ პროცესში მონაწილე ყველა ქვეყნის უმაღლესი სასწავლებლისათვის. ამ მიმართულებებს შორის ყველაზე მნიშვნელოვანია ხარისხის უზრუნველყოფის ამაღლება შემოთავაზებული სტანდარტების მიხედვით. აქ ლაპარაკია სწავლის, სწავლებისა და კვლევითი მუშაობის ხარისხის ამაღლებაზე.
       2006 წელს უნივერსიტეტის საერთაშორისო განყოფილების სამსახურმა და უნივერსიტეტის ხარისხის უზრუნველყოფის სამსახურმა სერიოზული შრომა გასწიეს, რათა მოეძებნათ პარტნიორი უნივერსიტეტები ევროკავშირის ქვეყნებში და თელავის სახელმწიფო უნივერსიტეტისათვის შეექმნათ კონსორციუმი პროექტის დასაწერად. პროექტის მიზანი შიდა ხარისხის უზრუნველყოფის სისტემების განვითარება იქნებოდა. 50-ზე მეტი წერილი გაიგზავნა ევროპაში ასეთი კონსორციუმის შექმნის მოწოდებით. იყო გამოხმაურებები. საბოლოოდ, კონსორციუმი შედგა 5 საგანმანათლებლო დაწესებულების მონაწილეობით.

1. ჰანის პროფესიული განათლების უნივერსიტეტი (ნიდერლანდები) - პროექტის შემტანი და გრანტის მიმღები;
2. აკადემიური მომზადების ასოციაცია (ნიდერლანდები) - პროექტის ძირითადი ავტორი და კოორდინატორი;
3. გრენობლის სოციალურ მეცნირებათა უნივერსიტეტი (საფრანგეთი);
4. მარბურგის უნივერსიტეტი (გერმანია);
5. თელავის სახ. უნივერსიტეტი - კონსორციუმის წევრი პარტნიორი ქვეყნებიდან.

1. ეკონომიკური სოციოლოგიისა და სტატისტიკის პროფესორი როჯერ პენი - ლანკასტერის უნივერსიტეტიდან (დიდი ბრიტანეთი).
2. ნიკოლას ჰერენსი - ნიდერლანდების უნივერსიტეტების ხარისხის უზრუნველყოფის ინსტიტუტის პროექტების წამყვანი.
3. პროფ. მარკ გარსია - ტულუზის ეროვნული პოლიტექნიკური უნივერსიტეტის - მეღვინეობის კულტურის ცენტრის დირექტორი.

• საუნივერსიტეტო განათლების ხარისხის ამაღლება თელავის სახელმწიფო უნივერსიტეტში;
• საქართველოში მიმდინარე აკადემიური რეფორმების მხარდაჭერა;
• თელავის სახელმწიფო უნივერსიტეტის ინტეგრირება ევროპულ უმაღლეს საგანმანათლებლო სივრცეში.

• უნივერსიტეტის განვითარების ცენტრის შექმნა, რომელიც განახორციელებს პროექტით გათვალისწინებულ ღონისძიებებს. ეს მოიცავს:
• საუნივერსიტეტო განათლებისა და კვლევის ხარისხის გაუმჯობესებას;
• ზუსტი ინფორმაციის მიწვდას უმაღლესი განათლების ხარისხისა და სტანდარტების შესახებ სტუდენტებისა და თანამშრომლებისათვის;
• უნივერსიტეტის თანამშრომლებისათვის კვალიფიკაციებისა და მოთხოვნების სქემის შემუშავებას;
• პრაქტიკული რჩევებით დახმარებას პროგრამებისა და სასწავლო კურსების შედგენისას;
• კრედიტების მინიჭების დროს წარმოქმნილი სიძნელეების დაძლევას;
• ჩატარებული სამუშაოების მონიტორინგს.

        უნივერსიტეტის ხარისხის უზრუნველყოფის სამსახურთან ერთად პროექტის ფარგლებში გათვალისწინებულია ხარისხის უზრუნველყოფის სისტემის ჩამოყალიბება, რომელიც მოიცავს შემდეგ სფეროებს:

• სწავლა და სწავლება;
• კვლევა;
• ადმინისტრირება, მართვა და მომსახურება.

       პროექტი გადახედავს ევროკავშირის ქვეყნებში დანერგილ და აპრობირებულ ხარისხის უზრუნველყოფის სისტემებს და შეიმუშავებს შესაფერის მოდელს თელავის სახ. უნივერსიტეტისთვის. აკადემიური პერსონალისა და ადმინისტრაციის თანამშრომელთა გადამზადება მოხდება უცხოელი ექსპერტების მიერ ჩატარებული კონფერენციების, სემინარების, ვორქშოფებისა და საზღვარგარეთ სასწავლო ვიზიტების შედეგად. ასევე, დაგეგმილია აკადემიური პერსონალის გადამზადდება სწავლებისა და სწავლის სფეროში.

       პროექტის მუშაობის პირველ წელს გადაისინჯება უნივერსიტეტში არსებული სწავლებისა და სწავლის ხარისხის უზრუნველყოფის სისტემა.
       აკადემიური პერსონალი ყველა სასწავლო კურსის კურიკულუმისათვის მიიღებს ოფიციალურ შეფასების სისტემის სქემას.
       პროექტით დაგეგმილია კონსორციუმის წევრი უნივერსიტეტების ერთობლივი აკადემიური ჟურნალის გამოცემა.
       პროექტის მიმდინარეობის განმავლობაში მუდმივად შეფასდება შესრულებული სამუშაოები და შედეგები ეცნობება პროექტის მონაწილეებს.

სწავლების მაღალი ხარისხის მისაღწევად გაანალიზდება არსებული კურიკულუმები და სასწავლო მასალები. შეიქმნება სწავლისათვის უკეთესი გარემო. გამჭვირვალე გახდება კომპეტენციები და სწავლის შედეგები.
თელავის სახელმწიფო უნივერსიტეტში ჩატარებული ტრეინინგების დროს ევროკავშირის პარტნიორი უნივერსიტეტების ექსპერტები, პირველ რიგში, მოახდენენ სამი საპილოტე ფაკულტეტის (აგრარული, სოციალურ მეცნიერებათა და ზუსტ და საბუნებისმეტყველო) კურიკულუმების ანალიზსა და დამუშავებას.
თემაზე - "კრედიტები, როგორც კურიკულუმების განვითარებისა და ხარისხის უზრუნველყოფის იარაღი" - ჩატარდება ექვსი ოთხდღიანი შეხვედრა არა მარტო საპილოტე ფაკულტეტების, არამედ დანარჩენი ფაკულტეტების პროფესორ-მასწავლებლებისთვის. განხილული იქნება შემდეგი საკითხები:

• სილაბუსების წერა;
• კრედიტები;
• სწავლების თანამედროვე მეთოდოლოგია;
• სტუდენტთა შეფასების სისტემები;
• სამეცნიერო ნაშრომებისა და სტატიების წერა და სხვა.

1. პროექტის პირველივე წელს ბიბლიოთეკა გამდიდრდება სამი საპილოტე ფაკულტეტის ლიტერატურითა და ტექნიკური აღჭურვილობით. გარდა ამისა, გათვალისწინებულია ინტერნეტჟურნალების გამოწერა, რომლის გამოყენება ხელმისაწვდომი იქნება აკადემიური პერსონალისა და სტუდენტებისათვის. პროექტის მეორე წელს დანარჩენი ფაკულტეტებისთვისაც შეივსება ბიბლიოთეკა.
2. სტუდენტები ინტერნეტის საშუალებით შეძლებენ საგნის არჩევასა და დარეგისტრირებას. გამარტივდება სტუდენტთა მობილობა.
3. დაიხვეწება უნივერსიტეტის ვებ-გვერდი, დაიბეჭდება საპროგრამო ბროშურები და საინფორმაციო ბუკლეტები.
4. საპილოტე ფაკულტეტის ყველა კურსისათვის შეიქმნება სალექციო კურსების რიდერები.
5. ჩამოყალიბდება სტუდენტთა საკონსულტაციო სისტემა.